الشنب 
- ما في سعر واحد للموقع: الوظائف والمحتوى بيفرقوا أكثر من عدد الصفحات.
- اكتب طلبك بصفحة وحدة وابعتها لكل اللي بتطلب منهم عرض.
- اطلب العرض مكتوب بمراحل، ومعه المصاريف اللي بتتكرر بعد التسليم.
ما في سعر واحد للموقع، لأن كلمة «موقع» ممكن تكون صفحة وحدة فيها رقمك وخدماتك، وممكن تكون متجر كامل بدفع وحجز ولوحة تحكم. اللي بيحدد السعر ست أشياء: حجم الموقع، التصميم، الوظائف، المحتوى، الربط واللغات، وشو بصير بعد التسليم. لو عرفت جوابك على الستة قبل ما تطلب عرض سعر، بتوصلك عروض بتقدر تقارنها ببعض.
العوامل الستة
- حجم الموقع. كم صفحة، وكم نوع صفحة. عشر صفحات خدمات بنفس الشكل أسهل من ثلاث صفحات كل وحدة بتصميم مختلف.
- التصميم. قالب جاهز بيتعدّل على ألوانك، ولا تصميم بينرسم من الصفر لمشروعك. الثاني بياخذ وقت أكثر، ومش دايماً بتحتاجه.
- الوظائف. هون أكبر فرق. موقع بيعرض معلومات إشي، وموقع فيه حجز مواعيد، دفع إلكتروني، حسابات للزباين، أو متجر، إشي ثاني تماماً. كل وظيفة شغل لحالها.
- المحتوى. مين رح يكتب النصوص ويجهّز الصور؟ لو إنت، الشغل على المبرمج أقل بس الموقع بيستنى عليك. لو المبرمج أو كاتب، هاد شغل بينحسب.
- الربط واللغات. ربط الموقع بالواتساب، بنظام الحجز، أو بجدول الطلبات. وكمان عدد اللغات: موقع عربي وإنجليزي مش نسخ ولصق، كل صفحة بتنعمل مرتين.
- بعد التسليم. اسم الموقع (الدومين)، المكان اللي بينحفظ عليه (الاستضافة)، التحديثات، وتعديلاتك بعدين. هدول مصاريف بتتكرر، وفي عروض ما بتذكرهم.
ومش كل العوامل بنفس الوزن. الوظائف والمحتوى غالباً بيفرقوا أكثر من عدد الصفحات. صفحة زيادة فيها نص وصورة شغلها بسيط، بس زر «احجز وادفع» وراه شغل كثير ما بتشوفه: تأكيد، إلغاء، إشعارات، ولوحة يتابع منها فريقك.
ليش عرضين لنفس الموقع بيطلعوا بعيدين عن بعض؟
لأن كل واحد فهم طلبك بطريقته. إنت حكيت «بدي موقع لعيادتي»، واحد تخيّل خمس صفحات تعريفية، والثاني تخيّل حجز أونلاين ولوحة للموظفين. الاثنين مش غلطانين، بس عم يسعّروا شيئين مختلفين.
وفي سبب ثاني: شو داخل بالعرض وشو لا. عرض بيشمل كتابة المحتوى والمتابعة بعد التسليم مش زي عرض بيسلّمك الموقع وبيمشي. العرض الأرخص مش دايماً الأوفر، والأغلى مش دايماً الأحسن. اللي بيهمّك إنك تعرف على شو عم تدفع.
وفي سبب ثالث: طريقة الشغل. واحد بيشتغل لحاله، وواحد معه فريق تصميم وكتابة وفحص. مش واحد منهم أحسن بالمطلق، بس كل طريقة إلها تكلفتها ووقتها.
خطوة اليوم: اكتب طلبك بصفحة وحدة
قبل ما تحكي مع أي مبرمج، افتح ورقة واكتب:
- شو لازم الزائر يقدر يعمل بالموقع؟ يقرأ، يتواصل، يحجز، ولا يشتري؟
- شو الصفحات اللي بدّك إياها، بالاسم.
- مين رح يجهّز النصوص والصور.
- بأي لغات.
- في إشي لازم ينربط فيه؟
- مين رح يعدّل المحتوى بعد التسليم.
ولو في موقع عاجبك شكله، اكتب اسمه وشو اللي عاجبك فيه بالضبط. هاد بيختصر نص النقاش.
ابعت نفس الورقة لكل اللي بتطلب منهم عرض. هيك بتصير تقارن عروض على نفس الطلب، مش على تخيّل كل واحد. ولو لسا مش متأكد إذا اللي بدّك إياه موقع أصلاً، اقرأ موقع، تطبيق، ولا نظام؟ قبل ما تكمّل.
شو تطلب يكون مكتوب بالعرض
- السعر مقسّم على مراحل، مش رقم واحد للمشروع كله.
- شو داخل وشو مش داخل، بالاسم: المحتوى، الصور، الدومين، والاستضافة.
- مدة كل مرحلة، وشو بصير لو تأخر التسليم.
- كم جولة تعديلات قبل التسليم.
- المصاريف اللي بتتكرر بعد التسليم، ومين بيدفعها.
- مين بيملك الموقع والحسابات اللي عليه لما يخلص الشغل.
واللي بيعطيك سعر قبل ما يسألك ولا سؤال، غالباً بيسعّر موقع غير موقعك.
وبصراحة، مش كل مشروع بده موقع كبير من أول يوم. لو زباينك كلهم بييجوا من الواتساب والإنستغرام، ممكن صفحة وحدة مرتّبة تكفيك هسّا، وتكبّرها لما تحتاج. وإذا بدّك تشوف كيف أنا بشتغل، هاي صفحة خدمة المواقع.
أسئلة عن الموضوع
ليش ما حدا بيعطيني سعر موقع مباشرة؟
لأن السعر بيتحدد حسب الصفحات والوظائف والمحتوى. اللي بيعطيك رقم بدون ما يسأل، بيسعّر تخمينه مش طلبك.
القالب الجاهز أسوأ من التصميم الخاص؟
لا. لمشروع بده موقع تعريفي واضح، القالب المعدّل منيح بيكفي. التصميم الخاص بيستاهل لما شكل الموقع جزء من قيمة مشروعك.
شو المصاريف اللي بتضل بعد ما أستلم الموقع؟
الدومين والاستضافة بيتجددوا، وممكن صيانة وتعديلات. اطلب يكونوا مكتوبين بالعرض.
مهندس برمجيات ومحلل أعمال. ببني للمشاريع أنظمة بترد وبتحجز، أتمتة، مواقع وتطبيقات.
تعرّف عليّ
التعليقات
لسا ما في تعليقات. كن أول واحد.